Ibasura an Epira Law, Solbaron an Krisis ha Kuryente, Panawagan han Bayan-SB kan Petilla ngan Aquino

November 9, 2012

News Release

Diri masosolbar an waray wantas nga pag-umento han kabaraydan ha presyo han kuryente ha Sinirangan Bisayas, tungod han programa ni Presidente Benigno Simeon Aquino III  nga nagtutugot han hul-os nga pribatisasyon ha enerhiya ngan/o kuryente ilarum han  Public-Private Partnership (PPP) ngan han Electric Power Industry Reform Act (EPIRA). Ini an pahayag  ni Jun Berino, Secretary General  han Bagong Alyansang Makabayan-Sinirangan Bisayas (BAYAN-SB).

 

Sumala pa kan Berino, bisan pa hi anay Gobernador han Leyte Jericho ‘Icot’ Petilla an nagin Secretary han Department of Energy (DOE), waray malalauman an katawhan  ha bug-os  nga nasud  ngan  mismo dinhi ha rehiyon nga maghihimo hiya hin pitad nga pugngan an padayon  nga paghinitaas han kabaraydan ha kuryente tungod kay mismo hi Icot Petilla suok ngan sunud-sunuran la han mga programa ni Aquino.

 

Nahimumutang mismo ha Leyte an usa han pinakadako nga surok han enerhiya sugad han Leyte Geothermal Production Field (LGPF). May kapas ini mag-prodyuser hin kuryente tubtob 620 ngada 800 megawatts (MW) kada adlaw. Bisan pa upat kapilo an ginkikinahanglan nga enerhiya han rehiyon, sobra-sobra pa an  napoprodyuser han Planta. Nagsusuplay gihap an LGPF ha iba nga rehiyon, sugad han Cebu nga naabot 200 MW, 50 MW ha Bohol ngan 200 MW ha Luzon.

 

Samtang, ginpamatud-an han BAYAN-SB nga ha pira katuig nga pangatungdanan han mga Petilla komo gobernador ngan pagin kongresista ha probinsya han Leyte, waray hini ginhimo nga resolusyon para pugngan an pagsapribado han  mga power generation units (PGU) nga nahimumutang ha Leyte, an nahitabo in naging ura-ura kamahal nga kabaraydan han presyo ha kuryente dinhi ha rehiyon.

 

“Kun ginlalauman nga dako nga pabor an pagin Energy Secretary ni Petilla, hadto pa kunta nagkamay-ada an mga taga Sinirangan Bisayas hin makatadungan, barato ngan akos ha bulsa nga sukot ha kuryente. An rehiyon pa yana an nag-aantos hin ura-ura kamahal nga kabaraydan  ha kuryente ngan inabot pa ha punto nga napalit na kita ha Palawan hin enerhiya, dara hini nga pag-abandona ni Aquino han iya responsabilidad ha katawhan nga tagan hin makatadungan ngan libre nga serbisyo komo usa man kunta an kuryente nga Public Utility,” pagduduon ni Berino.

 

Dugang pa han BAYAN-SB nga an PPP ngan EPIRA Law usa nga ‘peste ha katawhan’ tungod kay nagdadara ini hin mabug-at nga paras-anon ha mulopyo, sanglit nananawagan an Bagong Alyansang Makabayan (BAYAN-SB) ha katawhan nga  ‘makigbisog ngan tipahan an mga programa ni Pnoy nga kontra-katawhan.’

 

Gin-aayat han BAYAN-SB hi Secretary Jericho ‘Icot’ Petilla nga maghimo hin pitad nga ibasura an balaud nga PPP ngan an EPIRA Law, diri magpakatuta kan Aquino ngan solbaron an krisis ha kuryente, pagtatapos pa ni Berino.

 

Reference:                   Jun Berino, Secretary General

Bagong Alyansang Makabayan

Sinirangan Bisayas (BAYAN-SB)

bayansb@gmail.com, +63-916-911-2676

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s