#BlackFridayProtest | Martial Law, diri kabatunan para makab-ot an kamurayawan para ha katawhan han Mindanao – BAYAN SB

Pahayag han Bagong Alyansang Makabayan Sinirangan Bisayas ha Adlaw han Black Friday Protest

BAYANEV BlackFriday Protest
Mga alyado nga organisasyon han Bayan Sinirangan Bisayas naglansar hin rally kadugan han nasyunal nga #BlackFridayProtest. Photo (c) Kelvin Tonzon Facebook account

PRESS STATEMENT
MAY 26, 2017

MARTIAL LAW, DIRI KABATUNAN PARA MAKAB-OT AN KAMURAYAWAN PARA HA KATAWHAN HAN MINDANAO – BAYAN SINIRANGAN BISAYAS

Hugot nga ginkukundenar han Bayan Sinirangan Bisayas (BAYAN-SB) an pagdestroso, pagsunog ngan pag-okupar han mga pasilidad ha mga komunidad nga binuhatan han Maute group nga nagresulta hin kahibang han mga kinabuhi ngan pakabuhi, sugad man ha kadislokar han yinukot-yukot nga katawhan han Marawi.

Pero, hugot nga gintitipahan han BAYAN-SB an deklarasyon ni Presidente Rodrigo Duterte nga Martial Law ha bug-os nga isla han Mindanao, kahuman han nagin enkwentro giutan han tropa han Armed Forces of the Philippines (AFP) ngan Maute group ha siyudad han Marawi.

Dako an tahap nga an deklarasyon han Martial Law in pitad nga nahimugna tungod han kunsabuhay han imperyalismo nga US ngan an mga lokal nga mga niyutiyo hini sugad kan DND Secretary Delfin Lorenzana ngan an pira pa nga mga pasista nga elemento ha gabinete ni Duterte. Ha pagpatuman hin balaud militar, igin-abre hini an dako nga posibilidad ha pagsingabot han mga pasista nga elemento han estado ha ira gahum pampulitika-militar, nga nahitatabo bisan pa man hadton waray pa igdeklara an Martial Law.

Mahibabaruan nga sobra 8,000 na an pinanmatay tungod han “drug war” ngan mga insidente hin pagkaso, pagdakop han mga gintatahapan nga kaaway han gobyerno. Halaba na gihap an rekord han AFP ngan han Philippine National Police (PNP) ha pagtalapas han tawhanon nga katungod.

Ha pag-intindi ha kamutangan han kagubot ha Mindanao, diri angay hingalimtan han katawhan nga an imperyalista nga US asya an numero uno nga terorista ha bug-os nga kalibutan. Ginhimo ngan gin-armasan han US an mga IS groups ngan Abu Sayyaf para tagan hin rason an iya interbensiyon militar ha mga nasud kun diin mayda hiya dako nga interes ha karukayaknon han ekonomiya.

Sugadman han katatapos pala nga ika-33 nga Balikatan Exercises nganhi ha Sinirangan Bisayas, ini nga presente nga panhitabo ha Marawi City in usa nga perpekto nga oportunidad nga sisingabuton han imperyalista nga US ngan mersernaryo nga AFP para pakusgon ngan himuon nga lehitimo an ira mga opensiba kontra ha tanan nga pwersa ha Mindanao, ma-terorista man o diri.

Diri angay hingalimtan han katawhan nga an padayon nga gerra ha Mindanao in resulta han pira ka-dekada nga pananalumpigos han imperyalista nga mga nasud ha pangunguna han US ngan han mga lokal nga naghahadi nga klase. Padayon nga ginhihikawan an aton mga kabugtuan nga Moro han ira katungod nga magdesisyon para ha ira kalugaringon nga kagawasan hini nga mga pwersa.

#BlackFridayProtest in Tacloban City
Photo (c) Kelvin Tonzon Facebook account

Kinahanglan kitaon ni Duterte nga damo an mga armado nga grupo ha Mindanao sugad han New People’s Army, Moro Islamic Liberation Front (MILF) ngan Moro National Liberation Front (MNLF) nga kaistorya han gobyerno ha peace talks. Posible ini makaguba o mahingadto ha mas tikagrabe nga gerra ha Mindanao ngan ha bug-os nga Pilipinas.

Diri solusyon an pasista ngan militarista nga pagresolba han krisis panseguridad ha siyudad han Marawi. Sanglit, angay nga dagmit bulkason ni Duterte an iya deklarasyon han Martial Law. Diri angay hingalimtan han katawhan nga samtang diri nareresolba an ugat han gerra sibil, diri la ha Mindanao kundi ha bug-os nga nasud, diri makakab-ot an tinuod ngan panmaihaan nga kamurayawan.#

KATUNGOD PANTAWO, RESPETUHAN!
ATUHAN AN TERORISMO NGAN PASISMO KONTRA KATAWHAN!
MARTIAL LAW, DIRI SOLUSYON HA KAGUBOT HA MINDANAO!
NEVER AGAIN TO MARTIAL LAW!

#
StandWithMarawi

#JustPeace
#NeverAgain
#DownWithUSImperialism

Martial Law will not bring peace to the people of Mindanao – BAYAN EV

18582189_1706273536079882_6322170815630684741_n

PRESS STATEMENT
MAY 24, 2017

MARTIAL LAW WILL NOT BRING PEACE TO THE PEOPLE OF MINDANAO – BAYAN EASTERN VISAYAS

BAYAN Eastern Visayas declared opposition to President Rodrigo Duterte’s declaration of Martial Law for the entire island of Mindanao in light of the siege involving troops of the Armed Forces of the Filipinos and the Maute group in the city of Marawi.

“The declaration of Martial Law is suspiciously an orchestrated response masterminded by US imperialism and its local running dogs such as DND Secretary Delfin Lorenzana and many fascist elements in the Duterte cabinet. Instead of restoring peace, Martial Law will open not only Marawi City but the entirety of Mindanao to state security forces notorious for human rights violations,” said Rey Miranda, Bayan Eastern Visayas (Bayan-EV) Secretary General.

Yesterday, President Rodrigo Duterte made the announcement through Presidential Spokesperson Ernesto Abella. He is bound to return home today, cutting short his official trip in Russia.

“Let us not forget that US has crafted and armed IS groups and the Abu Sayyaf Group to justify its military intervention not just here in the Philippines but all throughout the world. Like the recently concluded 33rd Balikatan Exercises here in Eastern Visayas, the crisis situation in Marawi City is a ticket for US’ local war hawks and the mercenary AFP to legitimize and intensify their operations against all forces in Mindanao, “terrorist” or not,” added Miranda.

Meanwhile, Bayan EV has condemned the destruction and occupation of civilian facilities attributed to the Maute group.
“The various struggles in Mindanao are borne out of decades-old oppression and exploitation and the denial of the right to self-determination of the Moro peoples. Ekonomya pa rin ang usapin dito. Duterte must abandon the militarist response to the situation in Mindanao and instead redirect the government’s efforts to forge just and lasting peace by resolving the roots of all armed conflicts in the country,” ended Miranda.
Bayan EV is set to hold a mass action for peace today in Tacloban City.#

MARTIAL LAW, DIRI SOLUSYON HA KAGUBOT HA MINDANAO!
#StandWithMarawi #JustPeace #NeverAgain #DownWithUSImperialism

 

Reference:

REY MIRANDA
Secretary General
Bayan Sinirangan Bisayas
Contact info: 09295551343

Tipahan an Balikatan 2017 ha tahob han HADR training – Bayan SB

bayansbNEWS RELEASE
May 12, 2017

Balikatan 2017 ha tahob han HADR trainings , gintitipahan han mga patriyotiko nga grupo

Naglansar hin usa nga gios-protesta kanina han alas singko han kulop ha Rizal Avenue ha syudad han Tacloban an mga progresibo nga grupo ha pangunguna han Bagong Alyansang Makabayan – Sinirangan Bisayas para ipakita an ira pagtipa ha iginlalansar nga Balikatan 2017 exercises ha siyudad han Ormoc ha Leyte ngan Guiuan ha Eastern Samar. Iginbuksas han militante nga alyansa an mapan-uwat nga ehersisyo-militar han US ha nasud Pilipinas ha tahob han humanitarian assistance and disaster relief (HADR) trainings.

Pormal nga nagtikang an Balikatan exercises yana nga tuig dida han Mayo 8 ngan nakatalaan ini nga magtapos dida ha Mayo 19. Sumala ha mga report, hi Presidente Duterte na mismo an nag-suhestyon nga humanitarian assistance an magin sentro han ika-33 nga RP-US Balikatan yana nga tuig. Kasumpay hini, nakatalaan nga mag-ayad hin mga eskwelahan ngan maghatag hin mga serbisyo sosyal an mga visiting forces ha Ormoc ngan Guiuan. Sumala naman ha mga tag-protesta, usa la ini nga pag-kondisyon han US agud utro nga umabuyon an katawhan Pilipino nga mag-base hira ha nasud Pilipinas.

“Pagbulig” para han interes han US, kontra ha katawhan

Sumala ha People Surge, alyansa han mga biktima han mga kalamidad, diri kabalyo han mga ayuda nga iginhahatag han US ha mga biktima han mga daguraot an soberanya han nasud Pilipinas. Mahinunumduman nga ginpirmahan ni hadto Defense Secretary Voltaire Gazmin ngan US Ambassador Philip Goldberg an Enhanced Defense Cooperation Agreement, nga nagtutugot ha mga sundalo han US nga mag-base ha Pilipinas ngan libre nga gumamit han mga rekurso, lima la kabulan matapos lasurbuhon han superbagyo Yolanda an Sinirangan Bisayas.

Pira ka adlaw naman ugsa an ika-tulo nga anibersaryo han superbagyo Yolanda, iginpahinumdom naman han US Navy an ira paspas ngan aktibo nga pagbulig ha mga lugar nga naapektuhan han kalamidad komo pagbaton han mga hadto kritisismo ni Duterte kontra kan anay US President Barack Obama ngan han naghulga hiya hin pagpa-iwas ha mga sundalo han US ha nasud.

Basar han pahayag ni People Surge Secretary General Marissa Cabaljao, gingagamit han US, an numero uno nga contributor ha natatabo nga Climate Change, an mga kalamidad para himuon nga lehitimo an ira pagbase ha sulod han nasud ha tahub hin “pagbulig” ngan “pag-responde”. Dugang pa niya, nagpapabilin nga an paghut-hot ha katawhan Pilipino an rason han kada taglagudti nga “maupay” nga pitad nga gin-hihimo han US.

Gintudlok naman han tagapagyakan han Gabriela – Eastern Visayas nga hi Gina de Veyra an sunud-sunod nga Public-Private Partnership (PPP) programs han US ngan han mga burukrata kapitalista han nasud matapos an mga nahimo nga “pagbulig” han US ha mga biktima han Yolanda.

“Nagpapakita la ini nga diri nga diri para ha interes han katawhan an ginhihimo nga pagbulig han mga kano kundi para la gihapon ha ira kalugaringon nga interes ha ekonomiya”, pagmalatumat ni de Veyra.

US, may baratunon pa ha katawhan han Sinirangan Bisayas

Utro nga iginpahinumdom han League of the Filipino Students – Metro Tacloban Chapter ha katawhan han Sinirangan Bisayas an mga pan-aabuso ngan krimen han US ha rehiyon. Usa na hini dinhi an natabo nga pagmasaker ha maabot singkwenta mil (50,000) nga mga sibilyan ha Balangiga ha pamaagi nira nga “scorge the earth!” kun diin ginpatay an mga kalalakin-an nga na-edad hin diyes anyos pa-igbaw. Maabot naman hin 150 nga mga residente han Calbiga ha Weste han Samar an ginpanmatay han mga sundalo han Estados Unidos dida han tuig 1900.

“Sukwahi han igin-eedukar ha aton ha eskwelahan pinaagi han presente nga neoliberal nga sistema han edukasyon ha nasud, waray bisan san-o nag-protehir an imperyalista nga US han aton interes lugod ira la gin-siguro an ira makusog nga impluwensiya ha nasud Pilipinas”, sumala kan Mira Legion, LFS – Metro Tacloban Chairperson.

Padayon man liwat an panunukot han Gabriela ha brutal nga panhitabo kan Jennifer Laude, usa nga transgender nga ginpatay hin usa nga US Marine nga hi Lance Corporal Joseph Scott Pemberton nga naka-base ha Pilipinas pinaagi han VFA-EDCA. Pagmalatumat ni de Veyra, diri harayo nga mautro ini nga panhitabo bisan pa man ha proklamasyon nga diri igintutugot ha mga visiting forces an paggawas ha ira mga kampo kun waray upod nga AFP personnel.

Pagpaiwas ha mga tropa han kano, iginpanawagan

Natindog an Bagong Alyansang Makabayan – Sinirangan Bisayas nga diri dapat tugutan an presensya han mga sundalo han Estados Unidos ha nasud tungod nga usa ini nga dako nga pagtalapas ha igindeklara nga soberanya han nasud Pilipinas.

“Pinaagi han diri patas nga kasarabutan giutan han gobyerno han Pilipinas ngan US sugad nala han Visiting Forces Agreement ngan EDCA, naghahatag na kita hin katugutan ha imperyalista nga nasud nga manginlabot ha aton domestic affairs”, pagmalatumat ni Bayan – Sinirangan Bisayas Secretary General Rey Miranda.

Dugang pa niya, nahihimutang ha kadelikaduhan an nasud Pilipinas pinaagi han pagbase han mga numero uno nga terorista ha bug-os nga kalibutan. Gin-tagan man liwat niya hin duon an presente nga paghulga han North Korea nga andam hira bweltahan an mga base-militar han US nga naka-posisyon ha mga alyado hini nga nasud sugad han Pilipinas para la depensahan an ira kalugaringon nga nasud kontra ha agresyon han nasud. Ginpapaduroy man daw liwat nira an tensyon giutan ha Pilipinas ngan Tsina hiunong ha West Philippine Sea.

Dugang pa han Bayan-SB nga ulang gihap ha pagkab-ot hin tinuod nga kamurayawan an US labi na nga amo ini an numero uno nga nananabotahe han iristorya pangkamurayawan giutan han gobyerno han Pilipinas ngan han makawala nga grupo nga National Democratic Front of the Philippines (NDFP) sumala ha Kamurayawan, nagduduso han Just and Lasting Peace nga kampanya. “Mapapamatud-an ini pinaagi han ira direkta nga paggiya han presente nga kontra-insurhensiya nga programa han Armed Forces of the Philippines (AFP) nga Oplan Kapayapaan nga gintatahuban gihap hin Community Development Projects”, sumala kan Kamurayawan Spokesperson Joshua Sagdullas.

Ha katapusan, gin-ayat ni Miranda hi Presidente Duterte nga tindugan an iya mga pulong kontra-US ngan an iya mga proklamasyon nga pabor unta ha interes han katawhan. Iya man liwat iginpanawagan ha katawhan han Sinirangan Bisayas ngan han bug-os nga nasud nga maging mabinantayon ha mga mapan-uwat nga pitad han Estados Unidos.###

Reference:
Rey Miranda
Secretary General
Bayan Sinirangan Bisayas

US-RP Balikatan Humanitarian Assistance & Disaster Relief: Pantahob ha interbensyunismo militar han imperyalista nga US

Giya ha Pagtalakay | Igin-andam han Bagong Alyansang Makabayan Sinirangan Bisayas

Impluwensiya militar han US ha Pilipinas, nagpabilin nga makusog ha administrasyon Duterte!

Ha luyo han kontra-US nga mga pahayag ni Presidente Rodrigo Duterte sugad han iya agresibo nga mga pulong nga pabor ha pag-undong hin independent foreign policy, nagpabilin nga makusog an impluwensiya han imperyalista nga US ha nasud, labi na ha karukayaknon ekonomiya ngan militar, ha sakob han administrasyon Duterte.

Makusog nga iginrehistro han katawhan an panawagan nga igbasura an diri-patas nga mga tratado giutan han Pilipinas ngan US, bisan ha pagsulod pala han bag-o nga administrasyon, kundi nagpabilin gihap nga konserbatibo ngan diri tangkod hi Duterte ha iya mga pulong nga tumubtob la ha “pag-kanselar” han joint military exercises han US ngan Pilipinas, pero diri hul-os nga pag-utod hini.

Nagpabilin an diri-patas nga kasarabutan sugad han Visiting Forces Agreement (VFA) ngan han Enhanced Defense Cooperation Agreement (EDCA). Landaw nga nagin operasyunal an EDCA labi na katapos bulkason han Communist Party of the Philippines-New Peoples Army (CPP-NPA) ngan han gobyerno han Pilipinas (GRP) an interim unilateral ceasefires han pareho nga gapil pati an anay pagka-suspendir han negosasyon pangkamurayawan o peace negotiations dida han bulan han Pebrero.

Naghagudalan han anay kautod ha GRP-NDFP peace talks an pananabotahe han mga elemento han Armed Forces of the Philippines (AFP) ha lugaring hini nga ceasefire declaration kun diin nahipatik an ceasefire violations ha sobra 500 nga baryo ha Pilipinas. Nagpabilin nga kaway han imperyalista nga US an AFP nga nagsasabotahe han peace talks.

Balikatan 2017

Yana nga Mayo 8, pormal na nga nagtikang an Balikatan 2017 ha siyudad han Ormoc ha Leyte ngan bungto han Guiuan ha Eastern Samar ngan magtatapos ha Mayo 19.

Basar ha pahayag han Presidential Commission on the Visiting Forces Agreement (PCVFA), an pwersa-militar han US in mabulig la ha pagtukod hin mga eskwelahan ngan paghatag hin serbisyo sosyal ha Ormoc ngan Guiuan. Hi Presidente Duterte na mismo an nag-suhestyon nga an paghatag hin Humanitarian and Disaster Relief (HADR) an tutukan han “visiting forces”.

Yana nga tuig, 80 nga sundalo tikang ha Australia ngan 20 tikang ha Japan an mabulig ha maabot 2,800 nga sundalo ha Pilipinas ngan 2,600 nga sundalo nga Kano ha ira ehersisyo militar. Bisan man kun gintanggal an maritime exercises pabor ha HADR, nagpapabilin nga waray iba nga tumong an Balikatan Exercises yana nga tuig kundi an estratehiko la gihap nga pagposisyon han US ha iya pwersa pan-giyera ha nasud.

Gingagamit an HADR ha Balikatan agud makuha an simpatiya han katawhan Pilipino

Tungod han makusog nga propaganda pagbuksas han pamasista ngan paniyupi han imperyalista nga US ha nasud Pilipinas, ginpamaagian han US kun tiunan-o mapapahamot iton iya kalugaringon agud makumbinsir an katawhan Pilipino. Ginpahaluag pa han US an iya mga aktibidad pan-psywar o pagkondisyon ha huna-huna han publiko. Hugot nga nakigkunsabo an US ha mga burukrata kapitalista ha gobyerno agud utro nga hangkupon han katawhan an pagbalik ha nasud han mga base militar han US tikang han palayason ini han katawhan hadton 1991.

Ginkukumbinsir nira an katawhan Pilipino nga sangkay nira an US ngan mayda hini pareho nga interes ha kaupayan han kadam-an nga mulopyo, sugad nala han ira iginpahayag han Nobyembre ha nakalabay nga tuig, harani an ika-tulo nga anibersaryo han Yolanda. An ira mapan-uwat nga mga aktibidad asya an:

  1. Panhatag hin Humanitarian and Disaster Relief (HADR) para kuno “mapa-uswag an kapasidad han pagresponde ha mga kalamidad, serbisyo medikal, pagdonar han mga libro, ngan pagtindog o pag-ayad han mga building han eskwelahan ngan mga health centers o sentro panlawas”;
  2. Livelihood pinaagi han USAID upod han pag-papautang ha gobyerno;
  3. Paghahatag hin joint training exercises agud madugangan an kaaradman han AFP ngan panhatag hin pinaglumaan nga mga armas, sarakyan ngan higamit pan-giyera.
  4. Paghahatag hin mga counterterorrism drill sugad han advance marksmanship ngan counter improvised explosive devices (IEDs), maritime interdiction sugad han natatabo ha West Philippine Sea, ngan amphibious raids.

Ha maiha nga panahon, gingagamit han imperyalista nga US an iya Overseas Development Assistance (ODA) ngan mga pautang ha gobyerno han nasud Pilipinas para gamiton ha pagtutukod hin mga eskwelahan ngan health centers o paghahatag hin mga ayuda ha panahon nga may dagko nga daguraot agud himuon nga mahamot ngan lehitimo an ira “pagbabalik-Pinas”.

Mapapamatud-an ini han singabuton han US an grabe nga danyos nga igindurot han superbagyo Yolanda ha nasud Pilipinas para maipalusot an EDCA nga ginpirmahan ni hadton National Defense Secretary Voltaire Gazmin ngan US Ambassador Philip Goldberg ilarum han papet nga administrasyon ni Noynoy Aquino, lima la kabulan la matapos lasurbuhon han superbagyo Yolanda an Sinirangan Bisayas.

Iginpamarayaw han US an ira paspas nga panhatag hin ayuda ha mga biktima han superbagyo Yolanda kundi naipakita naman an tinuod nga rason hini. Hadton nakalabay nga tuig, “iginpahinumdom” han US Navy an ira relief and rehabilitation operations ha mga lugar nga naapektuhan han bagyo Yolanda matapos nagpahayag hi Duterte hin mga kritisismo kan anay US President Barack Obama ngan an iya paghulga nga paiwason an mga tropa militar han US ha Pilipinas.

Samtang, makikita liwat nga maiha nga gin-andaman han US ngan han gobyerno han Pilipinas an pagbase han US ha Guiuan ngan Ormoc ha Sinirangan Bisayas dida pa man han mga nakalabay nga tuig. Hadton Mayo 2016, umatendir hi US Ambassador Philip Goldberg ha usa nga seremonya han Millennium Challenge Corporation of the USA ha Eastern Samar kun diin nahilakip an pagpondo hin 222.49-M dolyar nga nakaalotaga para ha pagpaupay ngan rehabilitasyon han Paranas-Taft-Borongan-Guiuan nga dalan.

Dida naman han Septyembre 2016, nadiskusyunan na han alkalde han siyudad han Ormoc nga hi Richard Gomez kaupod an pira nga mga sundalo nga Pilipino ngan Amerikano an pag-host han siyudad han Balikatan kun diin iginpatapod han mga sundalo nga papaupayon nira an peace and order situation ha siyudad. Salit pa man, an igintatanyag han AFP ngan pwersa-militar han US nga “humanitarian” an rason han ira pagbase ha Sinirangan Bisayas in usa la nga buwa ngan utro pagtukod hin pundasyon para ha pagpahaluag han imperyalista nga gahum han US, ngan para gamiton an Pilipinas ha military projection hini kontra ha iba nga nasud nga ira kaaway sugad nala han North Korea. Usa la gihapon ini nga pagtalapas han soberanya han nasud.

Nagin pamaagi liwat ini ha padayon nga pag-kontrol han US ha mga domestic affairs han Pilipinas.

Estratehiko para ha US nga magbase ha Pilipinas

Sugad han mga probisyon ha EDCA, pwede magtukod an US hin kampo ngan mga ginkikinahanglan nga imprastruktura, pasilidad ngan libre nga paggamit han utility (tubig, kuryente, ngan iba pa), magtambak hin armas, dumuong ngan serbisyuhan an ira mga sarakyan pan-giyera, magtukod hin communication facilities, ngan maglansar hin durudilain nga mga aktibidad an bisan ano kadako nga ihap han armado nga pwersa han US ngan mga contractors nira ha tinatawag nga “agreed locations” (ginkaurusahan nga lokasyon) ha Pilipinas sugad han Ormoc ha probinsiya han Leyte ngan Guiuan ha Eastern Samar. An Eastern Visayas aada mismo ha ganggang han Dagat Pasipiko.

Para ha pinakamakusog nga nasud ha bug-os nga kalibutan, an Pilipinas nahimumutang ha pinaka-estratehiko nga lokasyon. Para ha US, paborable nga magpabilin an Pilipinas ha iya dominasyon para makontrol an balyuay ngan komersyo ha rehiyon Asya-Pasipiko nga asya an pinakahaluag nga kuhaan yana han natural nga karikuhan, barato nga hilaw nga materyales, kusog pagtrabaho ngan haluag nga merkado nga baligyaan han iya mga surplus nga produkto kaupod na an pagbaligya hin mga armas ngan higamit pan-giyera.

Nahimumutang ha kadelikaduhan an nasud Pilipinas pinaagi han pagbase han US

Ha pagbalik han base militar han Kano, maghahatag ini hin dalan para magin lansaran an Pilipinas hin giyera ngan panghinlabot han US ha nasud, ngan ha bug-os nga rehiyon. Naibubutang ha kadelikaduhan an rehiyon ngan an bug-os nga nasud tungod han presensya han tropa nga Kano labi na ha presente nga paghulga han North Korea, nga andam hira depensahan an ira kalugaringon soberanya kontra han agresyon han US ngan ada an posibilidad nga bweltahan an mga base-militar han US nga nakaposisyon ha mga alyado hini nga nasud sugad ha Pilipinas.

Samtang, ginpapahitaas naman an tensyon giutan han Pilipinas ngan Tsina ha pagbabase han US ha nasud. Man ngani, ha usa kabahin, gin-admiter naman han anay Presidente han US nga hi Barrack Obama – hadton pagbisita niya ha Pilipinas – nga waray ha kasarabutan an pagprotehir han US ha Pilipinas kontra Tsina ngan waray hira plano nga rub-on an ira maupay nga sabot han Tsina. Pero posible pa ini dumuroy nga kamutang matapos han nakatalaan nga pagbisita ni US President Donald Trump ha nasud dida hiton bulan Nobyembre.

US an numero uno nga makigi-gyerahon ha kalibutan

Di angay hingalimtan nga an US an numero uno nga nagpasamwak hin giyera ha durudilain nga parte han kalibutan sugad nala han nahitatabo yana ha Syria, Afghanistan, pira nga mga nasud ha Middle East ngan Africa, ngan yana nag-anak pa hin mga terorista nga grupo. Mahihigop han Pilipinas an mga atake han damo nga kaaway (aktwal ngan potensyal) han US komo usa nga host han base militar hini.

Kontra-terorismo ngan kontra-insurhensiya la gihap an rason han Balikatan. Ginpapaduroy han US an kontra-insurhensiya ngan kontra-terorismo nga programa han AFP ha nasud. Man ngani, an US la gihap an nangunguna ha kontra-insurhensiya nga programa ilarum han administrasyon Duterte nga gintawag nga Oplan Kapayapaan.

Basar ha news release nga iginpagawas ha US Marines website, may-ada control center an visiting forces ha Cebu ngan mayda hini satellite stations ha Panay island, Ormoc ngan Guiuan kun diin mayda naman hira gintatawag nga simulation han communication systems tikang ha ira command center ha Visayas pero waray klaro nga pahayag kun para diin ini gagamiton. Basar ha mga report, may-ada mga naglulupad-lupad nga drones ha ika-tulo nga distrito han Leyte nga posible kaparte na han ira plano nga interbensyon ha mga rebolusyonaryo nga pwersa ha rehiyon nga naglalansar hin gerra sibil kontra ha gobyerno han Pilipinas.

Diri angay kalimtan an mga pan-abuso ngan krimen han US ha Sinirangan Bisayas

Waray utang nga kaburut-on an katawhan han Sinirangan Bisayas ha Estados Unidos kundi hira pa ngani an angay magbaton ha katawhan ha rehiyon ngan bug-os nga Pilipinas. Kun aton babalikon an kasaysayan ha rehiyon, diri naton angay kalimtan an nahitabo nga pag-masaker han maabot singkwenta mil (50,000) nga mga sibilyan ha Balangiga dida han tuig 1901 kun diin gingamit ni US General Jacob Smith an palisiya nga “scorge the earth!” nga nagpatay han tanan nga kalalakin-an nga na-edad hin 10 anyos tipa-igbaw; ngan an Seige of Calbiga han tuig 1900 nga nagdurot hin danyos nga maabot 150.

Usa naman nga sibilyan an ginpatay hin usa nga US Navy personnel ha usa nga irinuman ha siyudad han Tacloban matapos hini pagkastiguha nga nagin kawsa han iya pagkamatay. Waray ini ginkasuhan han Philippine National Police ngan iginpagawas la nga naligis han garbage truck. Natabo ini dida han tuig-2015. Waray papagbatuna han gobyerno an gin-akusaran ngan hasta yana waray la gihapon katagi hin hustisya an biktima.

Diri naman harayo nga mahitabo utro an diri-makatawo ngan brutal nga pagpatay kan Jennifer Laude han usa nga US Marine nga hi Lance Corporal Joseph Scott Pemberton nga nakabase ha Pilipinas tungod han VFA-EDCA. Bisan pa man ha proklamasyon nga diri poyde gumawas ha ira kampo an mga visiting forces kun waray upod nga personnel tikang ha AFP, diri ini garantiya nga waray mahitatabo mga pagtalapas ha katungod han kababayin-an ngan mga LGBT.

 

Kontra-katawhan an pagtindog han US hin base militar ha Sinirangan Bisayas, o kun diin man nga parte ha Pilipinas

Sukwahi ha igin-hahambog ni Ormoc City Mayor Richard Gomez ngan Guiuan Mayor Sheen Gonzalez nga pagbulig han tropa han Kano ha ira mga tagsa-tagsa siyudad o bungto, diri pabor para ha mga mulupyo han ira lugar ini nga Balikatan exercises.

Kun titimbangon, guti-ay la an ayuda nga pag-ayad hin mga eskwelahan an iginhahatag han tropa han kano. Lugod, responsibilidad han gobyerno han Pilipinas an mag-tukod hini nga mga imprastruktura. Ha mas haluag nga paglantaw, pwede pa nga may iba pa nga adyenda an mga alkalde para han ira pag-suporta han ehersisyo militar ha ira lugar.

Labot la nga iginbubutang an katawhan Pilipino ha kadelikaduhan pinaagi hin paghimo han US ha Pilipinas komo usa nga base pan-giyera, gingagamit gihapon ini niya ha iya kalugaringon nga interes sugad han pagpahaluag han iya lupgop ngan kontrol ha ekonomiya ha Asya-Pasipiko.

Mahinunumduman nga igindeklara dida han tuig-2008 ni anay Secretary of State Hillary Clinton nga mapihit (Pivot to Asia) an 60 porsyento nga kusog pan-militar han US ha rehiyon Asya-Pasipiko tungod kay ini na an magigin pinakadako nga merkado ha kalibutan ha tuig-2020.

Ginsisiguro han US an iya gahum ngan impluwensya pan-ekonomiya ha bug-os nga rehiyon para dugang nga magpulos an mga monopolyo kapitalista ha ira nasud samtang ginpapabilin nga kablas an katawhan ha mga nasud hini nga rehiyon sugad nala han Pilipinas.

An mga neoliberal nga palisiya nga igin-imponer pinaagi han mga burukrata kapitalista ha sulod han gobyerno han Pilipinas an kawsa han padayon nga mga programa ha pribatisasyon, deregulasyon ngan liberalisasyon.

Apektado hini an katawhan Pilipino sugad han maiha na nga panahon nga pagtagundiri ha libre nga panhatag han tuna ha mga parag-uma. Ginpapadayon an atrasado ngan pre-industriyal ekonomiya tungod han monopolyo nga kontrol han pipira la nga mga pamilya ngan korporasyon ha dako nga parte han katunaan ha Pilipinas.

Padayon nga pinapaboran han gobyerno han Pilipinas an mga dagko nga kapitalista tungod han padayon nga kontraktwalisasyon ha mga trabahador, paghitaas han matrikula ha mga eskoylahan, pag-iban han badyet ha sektor han serbisyo sosyal sugad ha edukasyon ngan panlawas, pagbaligya ha pribado nga sektor han mga importante nga utilities sugad han kuryente ngan tubig, ngan iba pa.

Ulang ha pagkab-ot hin kamurayawan an presensya han mga Kano ha nasud

Yana nga iginduduso han katawhan Pilipino an tinuod nga reporma para ha mga kablas ngan yana nga mayda pag-abre an administrasyon Duterte para ha iristorya pangkamurayawan, makusog liwat an mga pitad han mga maka-tuo ngan maka-US nga paksyon ha sulod han administrasyon nga igsabotahe ini. Man ngani, ginngaranan han US nga mga terorista an rebolusyonaryo nga grupo han CPP-NPA.

Iginpapatuman han US an iya interbensyon gamit an mga instrumento ha pamuypoy han estado sugad han AFP ha pagdumara ni National Defense Secretary Delfin Lorenzana ngan han mga maka-US generals nga nagsusulsol ha gobyerno Duterte nga magin pabaru-bag-o ha katindog mahitungod han pagduso hin kamurayawan nga nakabasar ha hustisya.

Ha giya han US counter-insurgency (COIN) guide, nahimugna an Oplan Kapayapaan nga ha esensya pagpadayon la han nakalabay nga Oplan. Nagpabilin nga militarista an daup han AFP ha pagpuypoy ha armado nga rebelyon ha Pilipinas samtang gintatahuban ini pinaagi han kuno Community Development Projects o an anay Peace and Development projects.

Pangunahan han mga patriyotiko nga pwersa an panawagan nga igbasura an diri-patas nga mga tratado militar ngan kasarabutan ha ekonomiya!

Kinahanglan magkaurusa an katawhan Pilipino para ig-insister an aton soberanya ngan ipatuman han gobyerno Duterte an independent foreign policy. Kinahanglan masabtan han katawhan, partikular han mga mulopyo han Sinirangan Bisayas an prinsipal nga katuyuanan han Balikatan 2017 nga asya an padayon nga interbensyon han US ha internal affairs (iristoryahon pansakob) han Pilipinas.

Militante ngan agresibo nga maglansar hin mga paggios kontra ha Balikatan ngan anupaman nga porma han “mutual” military exercises. Kinahanglan naton igbuksas, ipanawagan ngan gumios nga igbasura an diri-patas nga mga tratado sugad han Mutual Defense Treaty (MDT), Mutual Logistics Support Agreement (MLSA), Visiting Forces Agreement (VFA) ngan Enhanced Defense Cooperation Agreement (EDCA).

Dugang nga magin mabinantayon ha pagudti-gudti nga ayuda nga iginhahatag han US ha porma han Overseas Development Assistance (ODA) kun diin kabalyo hini an dagko ngan mapanhibang nga palisiya han gobyerno Pilipinas nga mas napabor ha interes han US.

Maksimisahon an ngatanan nga oportunidad nga igduso an gobyerno Duterte nga 1) palayason an mga pwersa-militar han US ha nasud; 2) magin tangkod ha iya mga pahayag pagduso hin usa nga independent foreign policy; 3) igsulong an tinuod nga reporma para ha katawhan nga sukwahi ha reporma nga igintatanyag han imperyalista nga US.

Kinahanglan pangunahan han mga progresibo ngan patriyotiko nga pwersa an pag-urusa ha katawhan pinaagi han padayon nga pagpukaw, pag-organisa ngan pagpagios agud igbuksas ngan atuhan an mga maniobra han US ha natad pan-militar ngan pan-ekonomiya.

Kinahanglan naton igpakita an rebolusyonaryo ngan militante nga tradisyon ha pag-insister han aton lugaring nga soberanya. Diri tugutan han katawhan nga igsabotahe han US ngan han AFP an larang han katawhan nga magkamay-ada kamurayawan nga nakabasar ha hustisya.###

 

Maksimisahon an ngatanan nga midyum ngan porma han pagpukaw, pag-organisa ngan pagpagios han katawhan ha iba-iba nga sektor ngan lugar panarabahuan. Maksimisahon an social media ngan an tradisyunal nga midyum han radyo ngan TV para igbandera an makatadungan nga pagtipa ha Balikatan. Himuon an tanan nga creative ngan partikular nga pamaagi ha kada tagsa nga sektor agud epektibo nga maipasamwak an makatadungan nga mensahe.

Yana nga Mayo 15, bunyog ha usa gios protesta nga pagbubuhaton harani ha Leyte Provincial Capitol, nga sasabayan hin magkadirudilain nga parte han Sinirangan Bisayas. Ha maabot naman nga Hunyo 12, usa nga panhiluagan nga mobilisasyon han magkadurudilain nga sektor ha rehiyon an magkakatitirok ha usa nga gios-protesta ha siyudad han Tacloban para ha nasudnon nga pagkaurusa kontra ha Balikatan ngan imperyalismo nga US.